जीवन र सार्थकता

                                         डा. सिर्जना  भण्डारी 

 #अध्यात्म_दर्शन  #जीवन_दर्शन

भोक नभए भोजन व्यर्थ हुन्छ ! गुण नभए रुप व्यर्थ हुन्छ ! होस नभए जोश व्यर्थ हुन्छ ! सदुपयोग नभए धन व्यर्थ हुन्छ ! अर्थ नभए शव्द व्यर्थ हुन्छ ! विनम्रता नभए विद्या व्यर्थ हुन्छ ! साहस नभए तलवार व्यर्थ हुन्छ ! श्रद्धा नभए पूजा व्यर्थ हुन्छ ! परोपकार नभए मानिस व्यर्थ हुन्छ ! प्रेम नभए जीवन व्यर्थ हुन्छ ! किनकी प्रेम स्वयं परमात्मा हो । प्रेम अर्थात परमात्माका स्वरुपहरू अनेक छन्–

- स्नेह आफूभन्दा सानालाई !

- मायाँ हृदयको प्रियतमलाई !

- मैत्री आफू समान सहकर्मीलाई !

- श्रद्धा आफू भन्दा ठूलालाई !

- प्रशंशा उत्प्रेरणा जगाउनलाई !

- दया निरिह तथा निमुखाहरुलाई !

- करुणा आवश्यकता भएकाहरुलाई !

- उपकार समस्यामा परेकाहरुलाई !

- सेवा सृष्टिका सबैलाई !

- दान आफ्नो आत्मसन्तुष्टिलाई !

- भक्ति इश्वर अर्थात परमात्मा अर्थात परब्रम्ह अर्थात अस्तित्वलाई ! 

परमात्मा निराकार, निर्गुण स्वरुपमा हाम्रो भित्र र वाहिर सर्वत्र फैलिएको छ । हामी परमात्माबाट सिर्जित ब्रम्हाण्डिय महाउर्जामा पौडीरहेका छौं तर हामीलाई यो ज्ञान छैन जसरी पानीमा बाँचीरहेको माछालाई थाहा छैन उ महासागरमा पौडीरहेको छ, महासागर नै उसको जीवनको मूल आधार हो, मूल अस्तित्व हो भनेर । मानिसका चर्मचक्षुले हाम्रोे वरीपरि रहेको परमात्माको महाउर्जा देख्न सक्दैन, यसकालागि दिव्यचक्षु अर्थात तेस्रो आँखा खुल्नु आवश्यक हुन्छ र दिव्यचक्षु खोल्ने एकमात्र उपाय अध्यात्म साधना हो तसर्थ आफ्नो जीवनमा योग तथा ध्यान साधना अनुशरण गरौं र परमात्मालाई जान्ने तथा प्राप्त गर्ने मुक्तिको मार्गमा शरीर, मन, भाव, चित्तमा उर्जा तथा शाक्ति छँदै लागौं र मनुष्य जीवन सार्थक तथा प्रेममय बनाऔं, के थाहा माथि उल्लेखित स्वरुपहरु मध्य कुन रुपमा परमात्माले हाम्रो परिक्षा लिरहेको छ तथा हाम्रोको समिप आइरहेको छ ! त्यसैले आफ्नो अगाडि आएका हरप्रकारका अवसरहरुलाई बुझौं र त्यसको सम्मान र सही सदुपयोग गरौं । bsirjana@gmail.com